પંજાબના રાજપુરામાં કર્મભૂમિ એક્સપ્રેસના 4 ડબ્બાઓમાં લાગી ભીષણ આગ: ચાલુ ટ્રેનમાં મચી નાસભાગ, મુસાફરો સુરક્ષિત બહાર નીકળ્યા; કોઈ જાનહાનિના સમાચાર નથી
પંજાબના રાજપુરામાં સરાય બંજારા નજીક અમૃતસરથી ન્યૂ જલપાઈગુડી જઈ રહેલી કર્મભૂમિ એક્સપ્રેસ (12508) ના ચાર ડબ્બાઓમાં આગ લાગી ગઈ હતી. દુર્ઘટના સમયે ટ્રેન રેલવે ટ્રેક પર દોડી રહી હતી. સોશિયલ મીડિયા પર ડબ્બાઓમાંથી ઊઠતી ધુમાડાની ડમરીઓ સ્પષ્ટ જોઈ શકાય છે.
શું થયું?
ટ્રેન ચાલી રહી હતી તે દરમિયાન ડબ્બાઓમાં આગ લાગી અને ધુમાડો ઊઠતા જ મુસાફરોમાં નાસભાગ મચી ગઈ હતી.
જીવ બચાવવા માટે લોકો બીજા કોચ તરફ ભાગવા લાગ્યા હતા.
ચેઈન ખેંચીને ટ્રેનને રોકવામાં આવી અને મુસાફરો બહાર નીકળી આવ્યા હતા.
વાયરલ વીડિયોમાં ખેતરો વચ્ચેથી પસાર થતા ટ્રેક પર ઊભેલી ટ્રેન અને ધુમાડો જોતી લોકોની ભીડ દેખાઈ રહી છે.
રેલવેએ શું જણાવ્યું?
ઉત્તર રેલવેના CPRO હિમાંશુ શેખર ઉપાધ્યાયના જણાવ્યા અનુસાર, અંબાલા મંડળના સરાય બંજારા સ્ટેશન નજીક ચાર ડબ્બાઓમાં આગ લાગવાની માહિતી મળી હતી. સુરક્ષા પ્રણાલી સમયસર સક્રિય થઈ જવાથી ટ્રેન રોકી લેવામાં આવી હતી. આગ પર કાબૂ મેળવવાના પ્રયાસો ચાલુ છે અને તમામ સિનિયર અધિકારીઓ સ્થળ પર પહોંચી ગયા છે. હાલ પૂરતું કોઈ ઈજાગ્રસ્ત થવાની, અન્ય નુકસાન કે જાનહાનિની કોઈ માહિતી નથી.
નોંધ: આગ લાગવાના કારણોની હજુ સુધી જાણ થઈ શકી નથી. તપાસ બાદ જ સ્થિતિ સ્પષ્ટ થશે.
