હઝરત મુહમ્મદ સલ્લલ્લાહુ અલયહિ વસલ્લમ અને એક અઅરાબી (ગ્રામીણ અરબ) વચ્ચે ઘોડાની ખરીદી નક્કી થઈ અને આપ સલ્લલ્લાહુ અલયહિ વસલ્લમે એ અઅરાબી પાસેથી તે ઘોડો ખરીદી લીધો. વાતચીત પછી આ અઅરાબી નબી કરીમ સલ્લલ્લાહુ અલયહિ વસલ્લમની પાછળ પાછળ ચાલવા લાગ્યો, જેથી આપ સલ્લલ્લાહુ અલયહિ વસલ્લમ પાસેથી ઘોડાની કિંમત વસૂલ કરી લે. હઝરત મુહમ્મદ સલ્લલ્લાહુ અલયહિ વસલ્લમ ઝડપથી ચાલી રહ્યા હતા અને અઅરાબી ધીમે ધીમે ચાલી રહ્યો હતો. રસ્તામાં લોકોને ખબર નહોતી કે આપ સલ્લલ્લાહુ અલયહિ વસલ્લમે આ અઅરાબી પાસેથી તેનો ઘોડો ખરીદી લીધો છે. આથી લોકો એ ઘોડાની કિંમત લગાવવા લાગ્યા અને અઅરાબી સાથે ઘોડાની ખરીદી અંગે વાતચીત શરૂ કરી દીધી.
ઘોડાની વધુ કિંમત લાગવાથી એ અઅરાબીએ હઝરત મુહમ્મદ સલ્લલ્લાહુ અલયહિ વસલ્લમને અવાજ આપ્યો અને કહ્યું કે જો આપ સલ્લલ્લાહુ અલયહિ વસલ્લમ આ ઘોડો ખરીદવા માંગતા હો તો સોદો પાકો કરી લો, નહીંતર હું આ ઘોડો વેચી દઈશ.
હઝરત મુહમ્મદ સલ્લલ્લાહુ અલયહિ વસલ્લમે ફરમાવ્યું: શું તને ખબર નથી કે તેં આ ઘોડો મને વેચી દીધો છે?
એ અઅરાબીએ કહ્યું કે અલ્લાહની કસમ, મેં તો આ ઘોડો આપ સલ્લલ્લાહુ અલયહિ વસલ્લમને વેચ્યો નથી. અને એ અઅરાબીએ ઇનકાર કરતાં કહ્યું કે શું આપની પાસે કોઈ સાક્ષી છે કે મેં આ ઘોડો આપને વેચ્યો છે?
જ્યારે આ બાબત બની ત્યારે તે સમયે આપ સલ્લલ્લાહુ અલયહિ વસલ્લમ અને અઅરાબી પાસે બીજું કોઈ પણ હાજર નહોતું, એટલે સાક્ષીનો તો પ્રશ્ન જ ઊભો થતો નહોતો. તે સમયે જ્યાંથી નબી અકરમ સલ્લલ્લાહુ અલયહિ વસલ્લમ પસાર થઈ રહ્યા હતા ત્યાં હાજર લોકોમાં હઝરત ખુઝૈમા રઝિયલ્લાહુ અન્હુ હાજર હતા. જ્યારે તેમણે અઅરાબીને આ કહેતો સાંભળ્યો તો હઝરત ખુઝૈમા રઝિયલ્લાહુ અન્હુએ ફરમાવ્યું કે હું સાક્ષી આપું છું કે આ ઘોડો આપ સલ્લલ્લાહુ અલયહિ વસલ્લમે તારી પાસેથી ખરીદ્યો છે.
નબી અકરમ સલ્લલ્લાહુ અલયહિ વસલ્લમે ખુઝૈમા રઝિયલ્લાહુ અન્હુને ફરમાવ્યું કે તમે કયા કારણથી સાક્ષી આપી રહ્યા છો? જ્યારે અમારી વચ્ચે આ ઘોડાની ખરીદીનો સોદો નક્કી થયો ત્યારે તમે ત્યાં હાજર નહોતા. હઝરત ખુઝૈમા રઝિયલ્લાહુ અન્હુએ અરજ કરી:
યા રસૂલલ્લાહ! મારા માતા-પિતા આપ પર કુરબાન થાય, આપની તસ્દીક (પુષ્ટિ) કરવાને કારણે!..... જ્યારે હું આપે જણાવેલી આસમાની ખબરોની તસ્દીક કરું છું, ભવિષ્યમાં થનારા બનાવોની તસ્દીક કરું છું, તો શું હું આ ઘોડાની ખરીદીમાં આપની તસ્દીક ન કરી શકું?
હઝરત ખુઝૈમા રઝિયલ્લાહુ અન્હુના આ જવાબથી હઝરત મુહમ્મદ સલ્લલ્લાહુ અલયહિ વસલ્લમ ખૂબ ખુશ થયા અને ફરમાવ્યું:
હે ખુઝૈમા! આજથી તમે બે સાક્ષીઓના સ્થાને છો. (એટલે કે તમારી સાક્ષી બે સાક્ષીઓ બરાબર છે.)
અને ફરમાવ્યું: જેના હકમાં અથવા જેના વિરુદ્ધ ખુઝૈમા સાક્ષી આપી દે, તેમની એકલાની સાક્ષી જ તેના માટે પૂરતી છે.
