📝 એક વૃદ્ધ હાજીની દિલને સ્પર્શી જાય તેવી વાર્તા

♦️ એક મોટી ઉંમરના વૃદ્ધ એક યુવાન સાથે હજ માટે નીકળ્યા. જ્યારે તેઓએ એહરામ બાંધ્યો અને "લબ્બૈક" (હે અલ્લાહ! હું હાજર છું) પોકાર કર્યો, ત્યારે ગૈબ (અદ્રશ્ય)માંથી અવાજ આવ્યો: "લા લબ્બૈક" (તારી હાજરી કબૂલ નથી).

યુવાન હાજીએ આશ્ચર્યચકિત થઈને પૂછ્યું: "શું તમે આ જવાબ સાંભળ્યો?"

વૃદ્ધ હાજીએ આંસુ વહાવતા કહ્યું:

"હા, હું 70 વર્ષથી આ જ જવાબ સાંભળી રહ્યો છું. દરેક વખતે હું 'લબ્બૈક' કહું છું, અને જવાબ આવે છે 'લા લબ્બૈક'!"

યુવાને કહ્યું: "તો પછી તમે આ તકલીફ વેઠીને કેમ આવો છો?"

વૃદ્ધે રડતા રડતા જવાબ આપ્યો:

"તો પછી હું કોના દરવાજે જાઉં? ભલે મારો અસ્વીકાર કરવામાં આવે કે સ્વીકાર કરવામાં આવે, મારે તો બસ એના જ દ્વારે આવવાનું છે. એના સિવાય મારું કોઈ આશ્રયસ્થાન (પનાહગાહ) નથી!"

બરાબર એ જ સમયે ગૈબમાંથી અવાજ આવ્યો:

"જાઓ! તમારી તમામ હાજરીઓ કબૂલ કરી લેવામાં આવી છે!"

• [તફસીર રુહુલ બયાન, ભાગ 10, પાનું 176]