ત્રિપુરાના સિપાહીજલા જિલ્લામાં ભારત-બાંગ્લાદેશ સરહદ નજીક BSF જવાનો પર લાઠી-ડંડાથી હુમલો કરવામાં આવ્યો છે. આ ઘટના બોક્સાનગરના આશાબારી બોર્ડર આઉટપોસ્ટ પાસે બની હતી. હુમલામાં જવાનોના માથા ફાટી ગયા અને તેમની ગાડીના કાચ પણ તોડી નાખવામાં આવ્યા. પોલીસે આ મામલે 8 હુમલાખોરોની ધરપકડ કરી લીધી છે, જ્યારે મુખ્યમંત્રી માણિક સાહાએ હુમલાની સખત નિંદા કરતા ઉચ્ચ સ્તરીય તપાસના આદેશ આપ્યા છે.
બનાવ કેવી રીતે વકર્યો?
આશાબારી BOP પર BSF ની 49મી બટાલિયનના જવાનો તૈનાત છે. સોમવારે સવારે તેઓ દાણચોરી(તસ્કરી) સાથે જોડાયેલા કેસમાં કાર્યવાહી કરવા ગામમાં ગયા હતા.
આ દરમિયાન ગ્રામીણ લોકો સાથે બોલાચાલી થઈ અને એક જવાન દ્વારા હેફજુર રહેમાન નામના વ્યક્તિ પર લાઠીથી હુમલો કરવામાં આવ્યો હોવાનો આરોપ છે.
આનાથી રોષે ભરાયેલા ગ્રામીણ લોકોએ બોક્સાનગર-રહીમપૂર રોડ બ્લોક કરી દીધો, જેના કારણે રસ્તાની બંને બાજુ વાહનોની લાંબી કતારો લાગી ગઈ હતી.
કસ્ટડીમાં લેવાયેલા વ્યક્તિ પર દાણચોરીનો આરોપ છે.
હુમલામાં શું થયું?
રહીમપૂર BOP ના આસિસ્ટન્ટ કમાન્ડન્ટ રોહિત કુમાર પોતાની ટીમ સાથે ઘટનાસ્થળે પહોંચ્યા ત્યારે આક્રોશિત ભીડે તેમના પર હુમલો કર્યો અને તેમની ગાડીમાં તોડફોડ કરી.
એવો પણ આરોપ છે કે ભીડે જવાનોના હથિયારો છીનવવાનો પ્રયાસ કર્યો હતો.
વધુ જવાનો પહોંચતા ગ્રામીણ લોકો સાથે ઘર્ષણ થયું હતું.
રોહિત કુમાર સહિત અનેક લોકો ઘાયલ થયા છે. તેમને બોક્સાનગર પ્રાઈમરી હેલ્થ સેન્ટર લઈ જવામાં આવ્યા અને પ્રાથમિક સારવાર બાદ કેમ્પ પર મોકલી દેવાયા.
આ હુમલાનો વીડિયો સોશિયલ મીડિયા પર ખૂબ વાયરલ થઈ રહ્યો છે.
પોલીસની કાર્યવાહી
માહિતી મળતા જ પોલીસ ઘટનાસ્થળે દોડી આવી હતી અને જવાનો દ્વારા આપવામાં આવેલી ઓળખના આધારે 8 લોકોની અટકાયત કરી કલામચૌરા પોલીસ સ્ટેશન લઈ ગઈ છે.
અગાઉ પણ બની ચૂક્યા છે આવા બનાવો
એપ્રિલ 2024 માં દુર્ગાપુર ગામમાં દાણચોરી રોકવા દરમિયાન ભીડના હુમલામાં 3 જવાનો ઘાયલ થયા હતા.
નવેમ્બર 2025 માં વિશાલગઢમાં પશુ તસ્કરોને રોકવા ગયેલા જવાનોની ગાડીમાં ગ્રામીણોએ તોડફોડ કરી હતી, જેમાં 5 જવાનો ઘાયલ થયા હતા.
